Indien ’n verkoper meer as een kontrak of aanbod op sy eiendom aanvaar, moet dit op ’n gestruktureerde en regsgeldige wyse hanteer word.
Volgens die beginsel van ons kontraktereg, naamlik “eerste in tyd, eerste in reg”, geniet die eerste geldige ooreenkoms voorrang.
Die verkoper moet dus, wanneer hy verskeie kontrakte oorweeg, seker maak dat dit korrek gestruktureer word.
Daar is basies twee maniere om dit te doen:
1. Rangorde van kontrakte met opskortende klousules:
Die verkoper kan die kontrakte rangskik volgens voorkeur, byvoorbeeld eerste, tweede en derde.
Die tweede kontrak bevat dan ’n klousule wat bepaal dat die ooreenkoms onderhewig is aan die suksesvolle kansellasie van die eerste kontrak.
Die derde kontrak sal op sy beurt bepaal dat dit onderhewig is aan die kansellasie van beide die eerste en tweede kontrakte.
2. Gelyktydige aanvaarding met ’n waarborg-klousule:
Alternatiewelik kan die verkoper al die aanbiedinge aanvaar, onderhewig aan ’n klousule wat bepaal dat die koper wat eerste die vereiste waarborge lewer, die reg sal hê om die eiendom in sy/haar naam te laat registreer.
